Myntuís með "súkkulaði"
Ís, hver elskar ekki ís? Hér er einn ferskur og algjörlega sykurlaus ís sem þó slær á sykurlöngunina og nærir okkur í leiðinni… svona ís sem má borða í morgunmat og alveg einstaklega góður. Spínatið gerir ísinn grænan en bragðið fer algjörlega í felur, frosnu bananarnir sjá um áferðina, döðlurnar gera hann extra sætann, kakósmjörið og kakónibburnar leika svo hlutverk súkkulaðibitanna og gera það bara einstaklega vel, myntan setur svo punktinn yfir i-ið og gerir hann að ferskum myntuís.
Ég nota bæði kókosvatn og möndlumjólk í ísinn en kókosvatnið finnst mér gera hann extra léttann, kókosbragðið kemur þó ekki í gegn og möndlumjólkin heldur kremuðu áferðinni. Það er að sjálfsögðu hægt að velja að nota annaðhvort bara kókosvatnið eða möndlumjólkina ef þú ert óvön/óvanur að nota þessa vökva til að spara þér aðra fernuna.
Færslan er unnin í samstarfi við Krónuna á íslandi en þú færð allt í ísinn í stærri krónuverslunum.
Þú þarft (fyrir ca 2):
Handfylli frosið spínat
2 frosnir bananar
fersk myntublöð, ca 1/2 dl + auka til að toppa ísinn með
3 ferskar döðlur (taka þarf steininn úr)
1 msk kakósmjör, saxað
1/2 dl kókosvatn
1/2 ósæt möndlumjólk, ég kaupi þessa frá isola
1 msk kakónibbur + auka til að toppa ísinn með
Aðferð:
Komið frosnum bönunum fyrir í bitum í blandara eða matvinnsluvél ásamt spínati, myntublöðum, döðlum, kakósmjöri, kókosvatni og möndlumjólk.
Blandið vel þar til áferðin líkist rjómaís.
Bætið kakónibbum útí og blandið í stutta stund.
Berið fram í litlum skálum eða glösum og toppið með kakónibbum og myntublöðum.
Verði ykkur að góðu.
