Möndlu- og kókoskökur
Þessari langaði mig að deila fyrir jól því þessar voru oft bakaðar í desember …. þangað til möndlumjölið varð uppselt ALLS staðar. Ég vildi ekki gera ykkur það að deila jafn skemmtilegri uppskrift þegar hráefnið væri ófinnanlegt á landinu.
Uppskriftin myndi teljast til hollari smákaka, er glútenlaus og laus við hvítan sykur. Hún nýtur sín kannski bara betur í mars. Möndlumjölið er allavega til núna. Þær eru ekki ofursætar en gefa þér alveg þessa “smáköku” tilfinningu. Stökkar að utan og “tjúí” að innan.
Færslan er unnin í samstarfi við Rapunzel á íslandi en kókos-og möndlusmjörið með döðlunum leikur hér lykilhlutverki sem bæði sætugjafi og bragðbætir en sér líka til þess að þær haldast saman.
Þú þarft:
1 1/2 dl kókosmjöl
1 1/2 dl möndlumjöl
1/2 dl kókos-og möndlusmjör m/döðlum frá Rapunzel
2 msk hlynsíróp, t.d frá Rapunzel
3 msk þurrkuð trönuber eða rúsínur
1/8 tsk vanilluduft eða 1/4 tsk vanilludropar (má sleppa)
Aðferð:
Hitið ofninn í 180°
Hráefninu er öllu komið fyrir í stórri skál og hrært vel saman.
Mótið litlar kúlur, ca 14 stk og setjið á bökunarplötu. Mér finnst best að þjappa deiginu inní litla sleppiskeið. Gerið kökurnar svo flatar á bökunarpappírnum með lófanum eða glasi.
Bakið í ofni á 180° í 10 mínútur.
Takið kökurnar út og leyfið þeim að kólna alveg áður en þær eru borðnar fram.
Verði ykkur að góðu.
