Rótargrænmetisfranskar með spicy kasjúmæjó
Hollari franskar með chili mæjó úr lífrænum kasjúhnetum. Það getur verið ótrúlega skemmtilegt að skera allskonar rótargrænmeti í strimla, baka í ofni og borða eins og franskar. Ef þú hefur ekki prófað að baka rauðrófur í ofni með olíu og salti þá mæli ég með því að prófa það, þær gætu komið þér skemmtilega á óvart. Ég hef verið að leggja áherslu á að borða hreint matarræði, velja lífrænt og sniðganga öll aukaefni síðustu vikur og hef verið að vinna mikið með kasjúhnetur í dressingar og sósur. Kasjúhnetur eru frábærar í sósur, áferðin verður merkilega creamy og í þokkabót verður sósan full af næringu. Hér er ég með chili kasjú “mæjó” sem passar einstaklega vel með rótargrænmetisfrönskum.
Færslan er unnin í samstarfi við Rapunzel á íslandi.
Þú þarft:
ólífuolía
2 litlar rauðrófur
3 bökunarkartöflur
1 sæt kartafla
salt
Chili kasjú “mæjó”:
2 dl lífrænar kasjúhnetur, ég nota frá Rapunzel
1 dl vatn
1-2 hvítlauksrif
1 tsk gróft dijon sinnep
safi úr 1/2 sítrónu
1/4 ferskur rauður chili (eða eftir smekk)
salt
Aðferð:
Byrjið á að hita ofninn uppí 200°C.
Skrælið og skerið rótargrænmetið niður í strimla sem minna á franskar.
Dreifið grænmetinu á ofnplötu, setjið smá olíu yfir. Mér finnst ég þurfa minni olíu ef ég dreifi úr olíunni með því að velta grænmetinu aðeins til með höndunum. Stráið smá salti yfir og bakið í ofni í 30-40 mínútur, fer soldið eftir grófleika strimlanna.
Setjið allt sem á að fara í dressinguna í lítinn blender, eða blandið með töfrasprota. Smakkið til og bætið við salti, sítrónu eða chili eftir smekk.
Verði ykkur að góðu.
