Heimagerð lífræn möndlujógúrt

Ég hef reynt að borða sem mest basískt síðustu mánuði og möndlur hafa verið í uppáhaldi þar sem þær eru basískar. Ég geri möndlumjólk í hverri viku og langaði að prófa að gera jógúrt úr henni. Fyrstu tilraunir gáfu rosalega lítið hlutfall af þykkri jógúrt og mun meira af þunnum vökva eftir gerjunina. Það þýddi því ekki að hræra það saman nema vera með eitthvað til að binda. Ég prófaði mig áfram með chia en það varð bara alls ekki eins og ég vildi hafa það. Fyrr í vor sat ég fyrirlestra hjá náttúrulækni frá Perú þar sem hann talaði meðal annars um ýmsar jurtir og nefndi þar *Tara gum sem er notað til þykkja ýmislegt…. það fyrsta sem ég hugsaði var Möndlujórtin!! Ég yrði að prófa að nota það til að þykkja hana og nýta hráefnið betur. Vá hvað þetta er magnað efni, 100% náttúrulegt og loksins varð jógúrtin eins og ég vildi hafa hana! Þetta er búið að vera skemmtilegt tilraunaverkefni og mun ég svo sannarlega gera þessa aftur og aftur og aftur. Vegan, basísk og lífræn jógúrt algjörlega án allra aukaefna.
*Hægt er að nálgast Tara gumið í Dugguvogi 10 hjá Arnbjörgu Lindu grasalækni.

Ath. uppskriftin tekur í heildina 2 - 3 sólarhringa að útbúa.

Færslan er unnin í samstarfi við Rapunzel á íslandi.

Þú þarft:

Möndlumjólkin:

• 1 poki lífrænar möndlur frá Rapunzel, ca 3 dl.

• 9-10 dl vatn

• 2-3 döðlur

  *Ath aðeins helgmingurinn af mjólkinni er notuð í jógúrtina.

Jógúrtin:

• 3 hylki góðgerlar, ég nota þessa frá Probi mage því þeir eru hlutlausir á bragðið.

• 1/2 tsk vanilluduft (eða meira, fer eftir smekk)

• 1 rúm tsk tara gum (hægt að bæta í fyrir enn þykkari áferð)

Aðferð:

1. Byrjað er á að gera möndlumjólkina:

   • Möndlurnar eru lagðar í bleyti yfir nótt.

   • Morguninn eftir er þær afhýddar (valfrjálst) og settar í blender ásamt vatni og döðlum.

   • Mjólkinni er svo helt í gegnum síjupoka og hratið síjað frá (hratið er hægt að nýta í allskonar hollustukúlur eða rawkökur).

   • Nú er mjólkin tilbúin. Hellið mjólkinni í tvær hreinar (sterílar) krukkur 500 ml krukkur. Við notum aðeins aðra þeirra til að gera jógúrtina, hina má setja strax í ísskáp og njóta þegar orðin köld.

2. Jógúrtgerðin:

   • Takið aðra mjólkurkrukkuna og tæmið 3 góðgerlahylki útí hana. Notið tréáhald og reynið að blanda góðgerlunum vel og sjá til þess að engir klumpar séu, stundum þarf að klessa klumpum sem myndast uppað glerinu og nudda þá út.

   • Lokið henni með grysju og gúmmíteygju eða tvöföldun síjupokanum og teyju. Komið krukkunni fyrir á hlýjum stað. Ég set mína á gólfið þar sem hitaveiturörin liggja (ekki gólfhiti heldur bara hlýrri staður).

   • Leyfið mjólkinni að gerjast í amk sólarhring eða lengur eða allt að 2 sólarhringa. Lengri gerjun skilar súrara bragði.

   • Við gerjunina skilur mjólkin sig upp í tvö lög, þykkt efra lag og vökvakent neðra lag. Hægt er að hræra þeim saman eftir sólarhring og smakka og meta hvort þú viljir súrara bragð og lokað henni aftur og leyfa henni að gerjast áfram í 1/2 - 1 sólarhring til viðbótar.

   • Eftir gerjunina er hrært vel í krukkunni og vanillu og taragum blandað útí hana. Tara gumið getur klumpast fljótt svo ágætt er hræra vel á meðan því er bætt hægt útí og jafvel hrista krukkuna aðeins.

   • Lokið krukkunni vel með loki og setjið inní ísskáp og njótið þegar hún er orðin íssköld.

   Berið fram með ávöxtum og múslí eins og t.d. þessu ofurfljótlega pönnumúslíi, uppskrift hér, eða notið í jógúrtsósu með matnum … já eða bara eins og þú myndir nota hvað annað jógúrt.

Verði ykkur að góðu.