Falafel skál með tahinisósu

Falafel eru saðsamar bollur úr kjúklingabaunum og hægt að bera þær fram á ótal vegu. Að mínu mati á alltaf að bera falafel fram með tahinisósu, þá fær maður ekta austurlenskan fíling. Hér höfum við einfalda útgáfu af falafel disk með tahinisósu.

Þú þarft (fyrir 4):

Skálin:

• Olía til steikingar

• 1 poki falafelbollur - ég nota sænskar frá Dafgard en þær eru æðislega mjúkar og góðar

• 250 gr salatblanda

• 1 rauðlaukur

• 2 öskjur kokteiltómatar

• Ólífuolía

• Sítróna

Tahini sósan:

• 1 dl ljóst tahini frá Rapunzel

• 2 hvitlauksrif

• Safi úr 1 sítrónu

• 1,5 - 2 dl vatn

• 1 msk hlutlaus olía, t.d. sólblómaolía frá Rapunzel (má sleppa)

• 1/4 tsk jurtasalt

Aðferð:

1. Skolið og þerrið kálið og skerið niður rauðlaukinn og tómatana. Setjið salatið ásamt tómötum og rauðlauk í skál og hellið smá ólífuolíu og sítrónusafa yfir.

2. Hitið falafel bollurnar á pönnu í olíu á miðlungs hita.

3. Útbúið dressinguna á meðan bollurnar eru að hitna  með því að blanda öllum sósuhráefnunum saman í blender eða með töfrasprota. Ágætt að setja ekki allt vatnið í einu þar sem áferð sósunnar getur verið smekksatriði.

4. Borið fram sem salat diskur með falafelbollum og vel af sósu yfir.

Verði ykkur að góðu.